Uncategorized

Taliyihii Booliska Soomaaliya oo la aaminsanyahay in lasumeeyay khilaafka madaxda sare ee DFS awgeed, geeriyooday

iftineducation.com – Ra’iisul Wasaaraha Soomaaliya Cabdiweli Sheekh Axmed Maxamed, ayaa ka tacsiyeeyey geeridii naxdinta lahayd ee ku timid Allaah u naxariistee Taliyihii Ciidamadda Booliska Soomaaliyeed General Maxamed Sheekh Xasan Ismaaciil oo si kadis ah galabta ugu geeriyooday magaalada Muqdisho.


Isagoo ku hadlaya Magaciisa, kan Xuumadda iyo kan shacabka Soomaaliyeed ayuu Ra’iisul Wasaare Cabdiweli Sheekh Axmed tacsi u diray qoyskii asxaabtii iyo Ciidamadda Booliska Soomaaliyeed ee uu ka geeriyooday S/G Maxamed Sheekh Xasan Ismaaciil, waxana uu ugu duceeyey in Illaah janadii Fardowso ka waraabiyo.


“Qof kasta waa uu dhimanayaa, geeriduna waa xaq, anigoo ku hadlaya magacayga kan Xukuumadda iyo guud ahaan shacabka Soomaaliyeed waxaan Allah uga baryeynaa in uu naxariistiisa ka waraabiyo Marxuum Maxamed Sheekh Xasan Ismaaciil oo ahaa taliyihii ciidamadda booliska Soomaaliya isla markaana qeyb libaax kasoo qaatay dhismaha iyo qalabeynta ciidanka booliska.” Ayuu yiri Ra’iisul Wasaaraha Soomaaliya Mudane Cabdiweli Sheekh Axmed.


Gen. Maxamed Sheekh Xasan Ismaaciil ayaa bishii July loo magacaabay Taliyaha Booliska Soomaaliya
Gen. Maxamed Sheekh Xasan Ismaaciil ayaa bishii July loo magacaabay Taliyaha Booliska Soomaaliya
Dhanka kale Ra’iisul Wasaaraha ayaa magacaabay Guddiga Wasiiro ah oo ka kooban shan (5) oo beeritaan kusoo sameeya geerida kadiska ah ee ku timid taliyihii ciidanka booliska Soomaaliyeed.


Waxayna kala yihiin.


1. Ra’iisul Wasaare ku-xigeen ahna Wasiirka Diinta iyo Awqaafta, Mudane Ridwan Xirsi Maxamed (Guddoomiye)
2. Wasiirka Caafimaadka Mudane Cali Maxamed Maxamuud (Xubin)
3. Wasiirka Warfaafinta Mudane Mustaf Sheekh Cali Dhuxulow (Xubin)
4. Wasiirka Beeraha Mudane Axmed Cabdi Baaffo (Xubin)
5. Wasiirka Amniga Qaranka Mudane Khaliif Axmed Ereg (Xubin)


Warar la helayo ayaa sheegaya in tiro dad ah loo xiray arrimaha geerida Taliyaha Booliska, kuwaasoo ay ka mid yihiin milkiilayaal maqaaxi laga cunteeyo iyo qaar ka mid ah dhaqaatiirtii la tacaaleysay xaaladiisa xilliga uu xanuunka ku soo booday, waxaana meydkiisa la dhigay Isbitaal Digfeer oo ay Turkida gacanta ku heyso, halkaasoo la baarayo xanuunka uu u dhintay, inkastoo wararka qaar ay sheegayaan in wadnuhu istaagay.


General Maxamed Xasan Ismaciil oo ka mid ahaa saraakiishii booliska Soomaaliyeed mudada dheerna ka soo shaqeynayay ayaa horaantii bishii July ee sanadkan loo magacaabay taliyaha ciidamada Booliska Soomaaliyeed, isagoona wax badan ka qabtay Amniga Caasimadda iyo gobollada dalka mudadii uu xilka hayey.