Uncategorized

Shirkii Wasiirada Arrimaha Dibada IGAD oo la soo gaba gabeeyay iyo War murtiyeed laga soo saaray

iftineducation.com – Shirkii Wasiirada Arrimaha Dibada Urur Goboleedka IGAD ayaa si rasmi ah loo soo gaba gabeeyay duhurnimadii maanta, kadib muddo saacado ah oo uu shirkan ka socday Hotelka SYL ee ku dhow Xarunta Madaxtooyada.


Ra’iisul Wasaaraha Soomaaliya Cumar Cabdirashiid ayaa shirka Wasiirada Arrimaha Dibada IGAD soo xiray, iyadoo khudbad uu uga hadlay muhiimada shirkan ka jeediyay shirka, isla markaana soo dhoweeyay shirkan taariikhiga ah.


Ra’iisul Wasaare Cumar Cabdirashiid ayaa si gaar ah uga mahad celiyay Ciidamada ammaanka Soomaaliya iyo kuwa AMISOM, sidii ay u sugeen ammaanka intii uu socday shirkan iyo qabsoomidiisa, wuxuuna cadeeyay in dowladdu ay xoojin doonto ammaanka iyo hirgelinta federaalka.


Shirkan ayaa waxaa ka qeyb galayay Wasiirada Arrimaha Dibada Itoobiya, Kenya, Jabuuti iyo South Sudan, waxaana wehliyay wasiiru dowlayaasha Uganda iyo Sudan, waxaana xubnaha ka qeyb galay ka mid ahaa Wakiilada Beesha Caalamka u jooga Soomaaliya.


Ergeyga Qaramada Midoobey u qaabilsan Soomaaliya Nicholas Kay oo shirka ka hadlay ayaa ku tilmaamay in shirkan uu yahay mid taariikh ah oo muujinaya horumarka laga gaaray ammaanka iyo siyaasada Soomaaliya.


War murtiyeedkan oo ka koobnaa dhowr iyo labaatan qodob ayaa looga hadlay horumarada laga sameeyay Soomaaliya, sida dhismaha Maamul KMG, ammaanka, magaabistii Ra’iisul wasaare Cumar Cabdirashiid iyo bogaadin loo jeediyay waxyaabihii u qabsoomay dowladda Federaalka.


Wasiirka Arrimaha Dibada Itoobiya Dr. Tedros Adhanom oo ah Gudoomiyaha Golaha Wasiirada IGAD ayaa ugu dambeyn u akhriyay saxaafada war murtiyeedka laga soo saaray shirka, wuxuuna cadeeyay in Soomaaliya ay ku tallaabsatay horumar, isla markaana IGAD ay garab taagan tahay.


Dr. Tedros Adhanom ayaa sheegay in shirkan lagu qabtay Soomaaliya markii u horeysay tan iyo bur burkii dowladdii dhexe, isagoo xusay in shirkan uu ahmiyad gaar ah u leeyahay IGAD iyo guud ahaan shacabka Soomaaliyeed.


Wasiirka Arrimaha Dibada Itoobiya ayaa sheegay in IGAD ay xushmeyneyso u hayaan madax banaanida, qaranimada iyo midnimada dhuleed ee Soomaaliya.


Dhinaca kale Wasiirada Arrimaha Dibada IGAD ayaa goor dhow ka dhoofay garoonka diyaaradaha Aadan cadde, kadib shir hal maalin ah, isla markaana ay xalay ku hoydeen magaalada Muqdisho.