Uncategorized

Dastuurka Cusub Ee Somalia – Akhri Qodoba Muhiim Ah

iftineducation.com – CUTUBKA 1AAD – (BAAQA JAMHUURIYADDA)

Qodobka 1aad – Mabaadi’da Asaasiga
  1. Dastuurka Soomaaliya waxaa saldhig u ah Quraanka kariimka ah iyo Sunnada Nabi Muxammed (scw), wuxuuna hormarinayaa maqaasidda shareecada iyo cadaaladda bulshada.
  2. Soomaaliya waa dal Islaam ah, dadkiisuna ku abtirsadaan dunida Carabta iyo Afrikaanka.
  3. Dastuurka Soomaaliya wuxuu dhiirrigelinayaa xuquuqda aadanaha, talinta sharciga, shuruudaha guud ee xeerka caalamiga ah, cadaaladda, xukuumad loo dhan yahah oo ku dhisan wadatashi, kal-soocidda awoodaha sharcidejinta, fulinta iyo garsoor madaxbanaan oo leh hannaan ku dhisan la-xisaabtan iyo hufnaan oo ka jawaabaya danaha dadweynaha.
  4. Haweenku waa in ay ka mid noqdaan dhammaan hay’adaha guud ee qaranka, gaar ahaan jagooyinka laysu doorto iyo kuwa laysu magacaabo ee saddexda laamood ee dowladda iyo Guddiyada madaxabannaan ee Qaranka.

Qodobka 2aad – Dowladda iyo Diinta
  1. Islaamku waa Diinta Dowladda.
  2. Diin aan ahayn Islaamka laguma faafin karo dalka.
  3. Lama soo saari karo sharci aan waafaqsanayn Mabaadi’da Guud ee Shareecada Islaamka iyo Maqaasiddeeda (Ujeeddooyinkeeda).

Qodobka 3aad – Sarraynta Dastuurka
  1. Dastuurka Soomaaliya oo ku salaysan mabaadii’da shareecada Islaamku waa sharciga dalka ugu sarreeya, isaga ayay xukuumaddu u hoggaansamaysaa, wuxuuna hagayaa siyaasaddaha iyo go’aannada qaybaha xukuumadda oo dhan.
  2. Sida ku xusan Cutubka tobnaad ee Dastuurka, maxkamad ayaa burin karta sharci kasta ama tallaabo maamul oo ka soo horjeedda Dastuurka.

Qodobka 4aad – Gobannimada Jamhuuriyadda
  1. Soomaaliya waa Jamhuuriyad Federaali ah oo gob ah, kuna dhisan matilaad dadweyne loo dhan yahay oo dimoqraaddi ah.
  2. Shacbiga Soomaaliya waa hal, lamana kala qaybin karo.
  3. Gobannimada Jamhuuriyadda Soomaaliya waa muqaddas laguma-xadgudbaan ah.

Qodobka 5aad – Afka Rasmiga ah
  1. Afka rasmiga ah ee Jamhuuriyadda Soomaaliya waa Af-soomaaliga oo ka kooban: Maxaa tiri, Maay tiri iyo Carabi sida ku cad jadwalka.

Qodobka 6aad – Astaanka Qaranka
  1. Calanka Jamhuuriyadda Soomaaliya, sida lagu muujiyay qaybta A ee jadwalka koowaad, waalaydi buluug furan ah oo dhexda kaga taal xiddig cad oo shangees ah, madaxyo simanna leh.
  2. Astaanta Jamhuuriyadda Soomaaliya, sida lagu muujiyey qaybta B ee jadwalka koowaad, waxay ka kooban tahay gaashaan buluug ah oo leh xiddaayad dahabi ah, dhexdana ku leh xiddig shangees ah oo dheeh qalin ah leh. Gaashaanka dushiisa waxaa ku yaal rurkumo carbeed oo xardhan, lehna shan madax oo dahabi ah oo labada geesba ku yaalliin ay kala qaaran yihiin. Hareeraha waxaa ka haya laba shabeel oo isu tusmaysan, kuna kala taagan labo waran oo isku weydaarsan caaradda hoose ee gaashaanka, ayna weheliyaan laba caleen-cawbaar, diillin cadna ay ku qoofalan tahay.
  3. 3Sharci gaar ah ayaa laga soo saarayaa Heesta Qaranka.
  4. Sharci gaar ah ayaa laga soo saarayaa billadaha sharafta.
  5. Baarlamaanka ayaa soo saaraya sharciga maamuuska ay mudan yihiin calanka, heesta qaranka iyo billadaha sharata ee Jamhuuriyadda Federaalka ee Soomaaliya.

Qodoboka 7aad Dhulka Dowladda
  1. Gobannimada Jamhuuriyadda soomaaliya waxay koobeysaa dhulka Jamhuuriyadda oo idil, oo ay ku jiraan berriga, jasiiradaha, biyaha goboleed, ururkooda, hawadooda iyo geyi-qaaradeedka.
  2. Dhulka Jamhuuriyadda Soomaaliya waa laguma xad-gudbaan lamana qaybin karo.
  3. Guddoon afri Qarameed oo keliya ayaa lagu oggolaan karaa waxkabeddelidda dhulka Jamhuuriyadda Soomaaliya.

Qodobka 8aad – Magaalo Madaxda Qaranka
  1. Muqdisho oo loo yaqaanno Xamar waa Magaalo Madaxda Jamhuuriyadda Soomaaliya. Maqaamkma Magaalo madaxdu ay ku leedahay qaabdhismeedka federaalka ee Jamhuuriyadda wuxuu ku xusan yahay Cutubka 7-aad ee Dastuurka.

Hadaba Qodobada Dadka Soomaalida ah ay isku mari la’yihiin waxaa kamid ah in Haweenka ay ka qeyb galaan dhamaan Xilalka siyaasadeed kuwooda ugu sareeya, Waxaase ogaataan in culumada xitaa ay ku kala aragti duwan yihiin.

Qodobada kale ee halkan laga qaadan karo waxaa kamid ah in waxii qaldama loo celinayo maxkamada dastuurigga ah, aaway Shareecadii islaamka?

Waxaa kale oo ku jira in dastuurkan oo ku salaysan shareecadda islaamka aan laga hor imaan karin, maxaa loo dhi waayay in shareecadda islaamka aan laga hor imaan wax kasta oo dhaca?


Qodobada kale Waxaa kamid ah in Luuqada Soomaaliga ah ay tahay tan dalka waxaana ay ukala baxdaa May iyo Maxaa tiri? Aaway Lahjadihii kale ee dadka Soomaalida ah ku hadlaan sida dadka dega marka iyo qeybo kale oo Soomaalia ah.?


Fikirkaada Halkan kusoo Gudbi Insha Alllah
Beri la soco Cutubka Labaad ee Dastuurka qabyada ah

____________________________________
Wax Yar Akhri Wax Badan Ogoow
iftineducation Media Network
Admin@iftineducation.com